Wat ist nu hiete met Platt opm Darpe? wär schprickt et noch?
Sau lange, wie dä Liehe noch in Darpe arbait hem un nich sau wiet fahrn mossen, lehwe dat Platt noch besser.
Nahn Krieje sind schonmal veel Fremme her ekomm und etliche sind hier eblem. Dä hem sek awer ofte anepasst. Janz schlimm worre et nahn Ummeschturz 89. Veele Junke sind in Westen etockt, dahen, wo et juten Jeld for harte Arbeit jifft. Fast alle sind nu wech eblem. Inzwischen sind awer ok andere hier her etockt un en paar sind saujahr wedder ekomm, unse Dochter ok. Hier ist där Harz inner Nähe, man lewet opm Lanne, wai hem hier ne Kohphalle, en Dokter, en Tähnebräker, en Friseur ne Autowarkschtatt, en Bäcker, en Flahscher, ne Schaule, en Kinderjahrn, ne Fierwehr, ne Karche, en Friebad, en Dierjehäje, en Raituhtstatter, vorschiedene Handwarker, en Museum, en Schparkassenautomaten, en Imbiss, ne Ihsdehle, en klahnes Rathus en Kartuffelhandel, zwah jut sortierte Hofläden, ne Keeserie un saujahr en Winzer jift et bie uns. Ok dä Schportler heb schene Plätze un wiesen ok Laistungen. Wat witte nu noch mehr? Et is doch bahle for jeden wat dabije.
Dat, wat hier opm Darpe immer wennijer wart, is dat Platt.
Ek sillewest hewwe schon tau DDR-Tieten inner Schaule et Nahmiddahs ne Platt-AG hat, dä war jut besocht. Dat worre denn awer schwinne wennijer met där Wende. Da harre kahner mehr Interesse an sowat. Dä niejen Lehrer fähle dat Vorschtändnis und dä Insicht datau. Na ainijen Jahren hem sek en paar Eldern op dä Hinderbahne schtellt un ne Änderung dorchsettn wolln. Et worre mek Friedach inner letzten Schtunne ne Tiet ahn ebohn. Dat Resultat kenn je jiech vorschtelln. Nahn erschtn Jahr hewwe ek op ejehbm. Dat war nischt forrn ohl Mann, der inzwischen ok schon en bettchen schlechter höhrt!. Dat war et met där Schaule - nu is Schluß. Laht se tau sahn, wer dat noch mahken will - ek nich mehr!
Dä ahnzije jröttere Platt-Veranstaltung , dä hier mal elohpm is, war taur 1050 Jahr-Faier 1987. Davon hewwe ek noch en paar Bilder un wieder vorn hewwe ek noch etliche Texte mit in eschpeelt, dä jie jiech anhehrn kenn.
Hiete maken wai schon sait ainjen Jahrn en Nahmiddach taun Vortelln. Jeder där met mahken will, kimmt et Middewochens (immer den 3. in Monat) in et Pastornhuhs, da drähpm wai uns un wat op vortelln Platt. Wer kimmt, is da - un wer da is, där kann met vortelln, awer op Platt, dat soll woll sau sien!
SWau wie hier unde op dä Bilder seiht et denn uht.
